معلش اسف البوست طويل...بس خواطر حبيت اقلها ليكم.
اتعلمت سي و فيجول بيسك و انا 13 سنه ، كان ابويه و امي صرفوا مدخراتهم علي انهم يشتروا ليه كتب من امريكا بكل ما يملكوا علشان اتعلم برمجه و انا في السن ده. كانت مصيبتي الكبري ازاي اصلح التليفزيون بتاع البيت ، حاولت اتعلم الكترونيات مع نفسي معرفتش اطلاقاً ، كان فاتح محل الكترونيات جمب البيت ، كنت بمسحه و بوضبه الصبح علشان الفني يعلمني ازاي يقيس العناصر الالكترونيه. في يوم من الايام كان في زبون فندهت ليه بإسمه ( يا عيد احط الجهاز ده فين) ، راح وبخني بعدها قالي متقليش قدام الزبائن غير يا بشمهندس عيد ، رحت عيطت لامي و قلتلها لازم اخش هندسه الكترونيات طالما مش عارف اتعلم ده لوحدي. في نفس الوقت كنت بعمل جيمز، كنت بحاكي العاب الاتاري و اكتفيت ذاتيا من ده ، و دخلت في حاجات كبيره زي DirectX 5 و فيجول سي ++ 5 و عرفت حاجات كتيره اوي ساعتها ، لكن سبتها و دخلت كليه الهندسه.
دخلت و اتعلمت و فهمت ان عيد مش مؤهل انه يعلمني ، يشاء القدر ان التليفزيون يبوظ تاني ، ابويه خده لعيد ، و قاله هيتصلح ب 400 جنيه ، الكلام ده في 2003 ، والمبلغ ده كبير جداً ، كنت ساعتها في اولي كهرباء و عرفت حاجات بسيطه عن الالكترونيات بس خدت الاساسيات.
فكيت الجهاز و جبت الschematic بتاعته كان ورق كبير جداً و مخطوطات بالامتار ، جبت كتاب هندسه التلفيزيون بالانجليزي و فهمت يعني ايه تليفزيون ، و عرفت ازاي اصلا الاتاري كان بيرسم الصوره ازاي علي التليفزيون. التليفزيوين كان جايب خط عريض راسي ابيض و ده معناه ان دائرة الHorizontal deflection كانت بايظه.
غيرت الHOT- Horizontal Output Transistor ، و اتصلح التليفزيون ب 27 جنيه. مع العلم ان عيد كان بيقول الشاشه لازم تتغير (نصاب).
اتخرجت و اتبهدلت في اني ادور علي شغل ، قابلت واحد من الاسلاف السلفيين شغال في السويدي ، و كان فاتح مكتب للكورسات بتاعت الايمبديد ، و قالي بالنص مبشغلش خريجين خاص ، انا اشغل خريج خاص من الجامعه الامريكيه علشان نضافتهم و اشغل واحد من عين شمس علشان اجتهادهم ، لكن انت هشغلك السكرتير بتاعي و كان المرتب ب 450 جنيه. قلت له ماشي لان ساعتها ابويه كان عيان بفيروس سي و محتاج ادويه و علاج ووافقت. رحت مره بقميص و كان الزرار مفتوح ، قالي اقفل الزرار ده مينفعش تبين صدرك قدام الزباين ، رحت سبته و مشيت و لعنت اليوم اللي احتجت فيه لناس و العيشه في البلد دي.
من فشل لنجاح:
مشتغلتش في مصر ابدأ و لا ليه تأمينات فيها ولا نقابه ولا معاش ، جتلي فرصه اني اشتغل مدرس و باحث في السعوديه ، أبدعت و عملت براءه اختراع امريكيه اشترتها جوجل من الجامعه ، و سافرت سويسرا و ماليزيا و خدت ميدلايات دهب في الابداع ، بالصدفه المانيا خدتني و اشتغلت فيها و كملت فيها ، و انتقلت للنمسا و كملت فيها حياتي العمليه.
كان حلمي و انا صغير اني احط اسمي علي لعبه AAA ، و بس ، برمجه الالعاب صعبه جداً ، و مكنش عندي امل اني اشتغل في اي شركه كبيره بتعمل العاب ، بس لما جت الفرصه اشتغلت في شركه بتعمل لعبه اوربا كلها بتلعبها في موسم الشتاء اسمها Ski Challenge ، عملت الGame Physics بتاعها ، كان مرهق جداً و متعب و صعب جداً ، كنت بسافر مدن و قري في المانيا و اوربا علشان اصور اللاعب ازاي عضلاته بتتأثر بالرياح و بالجاذبيه ، علشان اقدر انمذج Modeling للاعب نفسه ، عرفت قد ايه ان برمجه الالعاب صعبه جداً ، و قلت اخر مره هعملها بس اسمي يتكتب علي اللعبه و خلاص و فعلا عملت اللعبه و خلصتها و لجأت لاكل العيش و اشتغل ايمبديد.
اشتغلت في كوالكم مهندس أول ، و اشتغلت في شركه شيبل لصناعه الهيكلوبتر مهندس اول في الايمبديد ، و بعدها اكتفيت.
حاولت اعمل مجتمع مطوري الالعاب في مصر و اعمل منتور لناس ، اخترت ثلاثه و ماشي معاهم لوصولهم الاحتراف ، و مستواهم بقي عالي جدا و ممتاز لحد دلوقتي و يقدروا يشتغلوا في اي شركه.
اتجهت للتعليم و حاولت اعمل مشروع لطلاب الثانوي في مصر ، بس للاسف مجاليش اي اهتمام من الحكومه المصريه.
حسيت زي الترانزستور بمرحله الsaturation ، لازم افيد ولاد بلدي باللي عرفته علي الرغم من انه قليل و مقارنه بالناس اللي اشتغلت معاهم ولا حاجه ، بس بحاول بقدر الامكان اساعد باللي اعرفه.
ظروف قاسيه في الغربه :
اخويه اتوفي في حادث غريب و انا متغرب و ملحقتش ادفنه بسبب الطيران ، ابويه اتوفي بسبب فيروس سي و ملحقتش اشوفه قبل ما يخش في الغيبوبه ، اتطلقت ، اتجوزت جوازه سوداء بمعني الكلمه من عائله متطرفه متشدده ، كل همهم الفلوس و تجار دين و شويه رعاع من بقايا المجتمع المصري اللي عايش في اوربا.
اصبت بالفشل الكلوي و بحارب معاه لحد اللحظه دي.
يبقي الامل اني اكمل المشوار و احقق طموحي الجاي اني انزل مصر و اكمل في مشاريع الدراسه و مساعده الطلاب بإنهم يتعلموا صح و يبقوا مؤهلين لسوق العمل في امريكا و اوربا.
و آسف علي الاطاله