جاتلي كتير اسئله عن الموضوع ده ، فحبيت اشارك خبرتي المتواضعه في بوست بدل ما ارد علي الخاص و علشان تبقي التجربه عامه.
القصه بدأت بلعب فيديو جيمز و انا صغير و كنت محترف ، لحد ما جالي ملل منها و فكرت ازاي بتتعمل ، للاسف ملقتش مصادر الكلام ده من 20 سنه ، انا بدأت الرحله من و انا 13 سنه ، كنت بشتري اسطوانه الفيجول بيسك ب 50 جنيه و اتعلمت فيجول بيسك 5 ، عملت كم لعبه بسيطه ، لحد ما وعيت علي الانترنت و الفضل كله يرجع لوالدي الله يرحمه و امي ، اشتروا ليه بكل ما يمتلكوا من مدخرات كتب من امريكا للسي ++ و تطوير الالعاب. بدأت و اتعلمت دايركت اكس 5 و 6 ، كان الموضوع صعب جداً قراءه كتب بلغه صعبه عليه فهمها. كانت رحله طويله جداً ، كنت في العيد الهديه اني اعمل Main Menu للعبه ، انقل كود الكتاب و استخدم المكتبه بتاعته و ادور علي لعبه من لعب الاتاري و اقلدها بالظبط ، بكل حاجه فيها ، حتي الصور كنت بنسخها بحيث انها تطلع بالظبط زي لعبه الاتاري. 
الرحله انتهت لحد ما دخلت هندسه ، كان شغفي بالالكترونيات كبير اوي ، كان نفسي اعرف ازاي الناس بتصلح الاجهزه ، امي طلبت منها في الاجازه في ثانوي اني اخد كورس صيانه تليفزيون عند مهندس وصفي وليم ، كان كل اللي معايه ناس كبار و و صنايعيه عايزين يتعلموا علشان يكسبوا رزق ، متعلمتش حاجه للاسف ، فدخلت كليه الهندسه ، كان قبلها في ثانويه عامه مكنتش مركز و كنت بعمل جيمز و كل ما اتعلم درس جديد في الميكانيكا ، اطبقه في الالعاب اللي بعملها.
انتهت الرحله بدخولي هندسه الاكترونيات ، اخترتها لاني مكنتش قوي فيها و معرفتش اعمل اللي انا عايزه ، حاولت استغل خبرتي في السوفتير و اتعلم ايمبديد ، اشتركت في روبكون مصر كذه سنه وراء بعد غلبت هندسه عين شمس و اللي غلبته اتعين عليه معيد يدرس لي السي.. المهم حاولت اجمع بين الالكترونيكس و الجيمز طب ازاي ؟

الدمج ما بين هندسه الالكترونيات و صناعه السوفتير
اولاً الجيمز محتاجه خوارزميات عاليه جداً و هياكل بيانات ، فاتعلمت و قرأت تقريبا ""كل"" كتاب عن الجيمز موجود في السوق و قرأت عن كل حاجه موجوده عن الخورازميات. قويت نفسي في الموضوع ده.
ثانياً عرفت الالكترون و عرفت هندسه التليفزيون و قرات كتب عن هندسه التليفزيون و اقدر اقرا المخطط بتاعه و اصلحه بكل حاجه فيه ، لحد ما وصلت اني ارسم بيكسل علي شاشه تليفزيون و اخر مشروع كانت علي الLCD.
ثالثاً: من بعد لما اتعلمت ارسم علي الLCD ، عرفت ارسم خطوط و مضلعات polygons ، و عملت 3D Cube. لاحظ رسم كل الحاجات دي علي ميكروكنترل محتاج حاجات كتيره جداً من التحسينات optimization ، صدقني هتفهم قصدي لو حاولت ده بنفسك.
رابعاً: قويت نفسي في برمجه الجرافيكس ، من بعد لما وصلت ازاي اصلا التليفزيون بيرسم ، عرفت ازاي جيمز كبيره زي Fifa بتتعمل ، بقيت اكتب shaders ، برامج علي الGPU، كتبت محرك جيمز بالسي ++ عرضته كذه مره هنا علي صفحتي.
خامساً: للوصول للنقطه دي محتاج تقوي نفسك جداً في السوفتير و تصميمه ، اتعلمت الDesign Patterns ، تصميم الOOP و كل حاجه ليها علاقه بتصميم السوفتير.
سادساً: كنت بشوف ايه اللي ناقصني في كومبيوتر ساينس و احاول اذاكره لوحدي ، كنت بخش علي لائحه الجامعات و اشوف الكورسات اللي ناقصاني ايه و اشوف المرجع و اقرأه و اطبق عليه ، ذاكرت Compilers ، عملت Basic Interpereter ، عملت Emulator لل جيم كونصول بتاعي علي الكومبيوتر زائد طبعا الكومبيوتر جرافيكس و الذكاء الصناعي في الالعاب خاصاً ، Graph Theory ، كومبيوتر فيجن... اي حاجه ليها علاقه بالبيكسل حاولت اعرف عنها كل حاجه.
سابعاً : التوفيق ، و الاجتهاد لازم يكون نتيجته ايجابيه ، بس فيه بارمترات في المعادله حاول توزنها ، انا وقعت في ظروف قسوي فوق ما تتخيل ، و حاولت و كافحت و هاجرت و اتغربت و اتعرضت لظلم في مصر و مشتغلتش فيها ابداً ولا شهر ، كل حياتي بره مصر.
اتمني تكون فرصتك احسن مني و تتعلم من الكلام اللي قلته و تبقي احسن مني و تساعد المهندسيين المصريين لان حالهم لا يرثي عليه ، هنبقي عايشين في غابه لوحدينا زي القرود وسط الاسود بتوع الهند و الصين و الروسيين ، فاتمني انك تمشي علي نفس خطتي انك تساعد الناس باللي اتعلمته!
و اسف علي الاطاله