مواقف حصلت لي في حياتي مش هنساها في الغربه و عبر.
كنت في حج 2011 ، كانت الدنيا بتمطر جامد جدا رعد و برق ، كان معايه صاحبي دكتور في الجامعه معايه ، شلت المحفظه بتاعتي معاه علشان كان في سيول و مطر ، و احنا بنطوف فجاه لقيته اختفي ، و المحفظه فيها الاقامه و فلوسي و كل حاجه فيها. فضلت اطوف و خلصت طواف الوداع ، رجعت ادور علي الاتوبيس بتاعي اللي هيوصلني للرياض ملقتوش ابدا فضلت 3 ساعات ادور عليه مش لاقيه ، و كانت هدومي متبهدله طينه و جعان. رحت مركز شرطه اجياد في مكه ، و قلت لهم انا مدرس في جامعه الملك سعود في السعوديه و محفظتي ضاعت و عايزكم توصلوني للرياض ، قالولي منقدرش نعمل حاجه ، ده موسم حج. خرجت من القسم و بعيط و دعيت دعاء قلت يارب ما تسبني في اللحظه دي، مشيت في النفق و عمال ادور علي الاتوبيس وسط الاف الاتوبيسات ، لقيت كارت الحمله بتاعتي علي الارض واقع ، مصدقتش وسط ملايين الناس لقيت الكارت ، رحت لفندق كان فيه مصريين و منظري متشرد ، قلت لهم لو سمحت اتصلوا بالرقم ده ، و اتواصلوا مع الحمله و قلتلهم انا في مركز شرطه اجياد و جم خدوني و جابلوي اكل ووصلت الحمد لله للرياض بسلام.
تاني موقف كنت جاي سازلبورج في رحله كفاحي في اوربا ، كان في شهر فبراير ، 2012 ، كانت الدنيا ثلج و درجه الحراره سالب 15 ، ركبت تاكسي و اروح علي الفندق نزلني سواق التاكسي الباكستاني و سابني و مشي ، لقيت الفندق قافل و مفيش استقبال ، فاتني ميعاد الcheck in ، الفندق زي الكهف في قريه وسط جبال ، كان منظر مرعب جداً جداً ، خرجت في الشارع الشنطه من الثلج اتكسر العجل ، وشي نمل من كتر البرد ، مش هنسي اليوم ده ، دعيت نفس دعاء مكه يارب ما تسبني في اللحظه دي ، يشاء القدر الاقي ولد و بنت ماشيين في الشارع و بيبوسوا بعض :D ، قطعت البوسه و قلتلهم ساعدوني باي تاكسي ، اتصلوا بتاكسي و خدني ووداني لفندق و اتصلت بالجامعه اللي هدرس فيها قلت لهم لو محدش جالي دلوقتي انا هسافر مصر دلوقتي ، الحمد لله جم خدوني وودوني السكن اللي عشت فيه و بدأت رحله الغربه.
تالت موقف ، جه رمضان و كنت بصوم ، كان الوضع في القريه صعب جداً ، مفيش محلات بتبيع لحم حلال ، كنت بروح ميونخ من سالزبورج ساعه قطر علشان اشتري هامبورودر او اي لحوم كل اسبوع ، كنت تعبان جداً من القريه اللي كنت عايش فيها ، لما لاقوني زمايلي مبكلش معاهم ، واحد منهم قالي انت بتصوم ، قلت له آه ، قالي لحد امتي ، قلت له لحد 9 بليل ، قالي بالنص They should rewrite the quran ، طبعا انزعجت جداً من الموقف ده ، و معرفتش ارد ، قلت له دي حريه شخصيه ، حاولت اكلم زميلي اليوناني ، اقله مينفعش ازدراء ديني ، قالي مش هيحصل حاجه دي حريه شخصيه ، سبت الجامعه مع عقد 4 سنين ، و هاجرت و نقلت مكاني لفيينا.
رابع موقف ، صاحبي اليوناني ، كان فاكرني اني شاذ ، علشان مبكلمش الطلاب البنات.

Top of Form